Գլխավոր Սպորտ Մխիթարյան․ «Մի՞թե ֆեդերացիայում տեղի ունեցած փոփոխություններից առաջ այսպիսի լավ հանդիպումներ չէինք ունեցել»

Մխիթարյան․ «Մի՞թե ֆեդերացիայում տեղի ունեցած փոփոխություններից առաջ այսպիսի լավ հանդիպումներ չէինք ունեցել»

112

Ինչպես հայտնի է, «Արսենալի» կիսապաշտպան Հենրիխ Մխիթարյանը Լոս Անջելեսում օրերս հանդիպել է ԱՄՆ-ի հայ համայնքի լրատվամիջոցների և սպորտային կազմակերպությունների ներկայացուցիչների հետ:

Հայ ֆուտբոլիստը, պատասխանելով ներկաների հարցերին, խոսել է ազգային հավաքականի վերջին հաղթանակների մասին: Հայաստանի ընտրանին 2020թ․ Եվրոպայի առաջնության ընտրական փուլում առավելության է հասել Լիխտենշտեյնի (3-0) և Հունաստանի (3-2) հավաքականների նկատմամբ:

«Դեռ շատ աշխատանք կա կատարելու: Վերջին 2 արդյունքները մարդկանց շրջանում թող տպավորություն չստեղծեն, թե մենք արդեն շատ քայլեր ենք կատարել առաջ: Քայլեր կատարում ենք, բայց քայլ առ քայլ, կամաց-կամաց:

Պետք չէ մտածել, թե Լիխտենշտեյնին ու Հունաստանին հաղթելը շատ մեծ ուրախություն է, որովհետև մենք կարող ենք ավելին անել: Իսկ ավելին անելու համար ավելի շատ աշխատանք է պահանջվում, և դա ոչ միայն ֆուտբոլիստների, այլև ամբողջ ազգի, հավաքականին մոտ կանգնած մարդկանց կողմից: Դա աշխատանք է, որը պետք է միասնական լինի: Չես կարող 1 կամ 2 հոգուց արդյունք պահանջել, բայց կողքինները նրանց չօգնեն»,- ասել է Մխիթարյանը:

Հայաստանի հավաքականի ավագին նաև հարց է ուղղվել, թե ընտրանու վերոնշյալ 2 հաղթանակներն արդյո՞ք ֆեդերացիայում վերջին շրջանում տեղի ունեցած փոփոխությունների արդյունքն էին:

«Իսկ մի՞թե ֆեդերացիայում տեղի ունեցած փոփոխություններից առաջ այսպիսի լավ հանդիպումներ չէինք ունեցել: Ընդամենը 2 հաղթանակ ենք տոնել, այնպես չէ, որ 10 անընդմեջ հանդիպումներում ենք առավելության հասել: Բոլորս էլ ցանկություն ունենք ցանկացած խաղում հաղթելու, որովհետև դա ոչ միայն մեր, այլև ժողովրդի հաղթանակն է: Կփորձենք հետագայում ևս հաղթանակներ տոնել և ուրախացնել բոլորին»,- Մխիթարյանի խոսքերը փոխանցում է AMGA TV-ն:

Մխիթարյան․ «Հնարավոր է՝ ինչ-որ չափով կոնֆլիկտ եղավ Մոուրինյոյի հետ․ ես երբեք չեմ բողոքել նրանից»