Գլխավոր Նորություններ 28 երեխա, 4 հղի. Թորոսյանը բացառիկ մանրամասներ է հայտնել կորոնավիրուսի թեմայով

28 երեխա, 4 հղի. Թորոսյանը բացառիկ մանրամասներ է հայտնել կորոնավիրուսի թեմայով

1121

Կորոնավիրուսին առնչվող և հասարակությանը հուզող մի շարք թեմաների առնչությամբ Sputnik Արմենիան զրուցել է ՀՀ առողջապահության նախարար Արսեն Թորոսյանի հետ։

Հայաստանում կորոնավիրուսով վարակված երեխաների թիվը 28–ն է, ինչպես նաև 4 հղի կա վարակված։ Sputnik Արմենիայի հետ զրույցում կորոնավիրուսի թեմայով այս և այլ մանրամասներ հայտնեց ՀՀ առողջապահության նախարար Արսեն Թորոսյանը։

«Կորոնավիրուսով վարակված թե՛ երեխաների, թե՛ հղիների առողջական վիճակը լավ է։ Նրանց մեջ չկան ծանր վիճակում գտնվողներ։ Ի դեպ, երեխաների և հղիների տվյալները երեկ երեկոյի իմ ունեցած տվյալներն են»,–ասաց նախարարը։

Թորոսյանի խոսքով` նորածինը, որի մայրը կորոնավիրուսով էր վարակված, թեստավորվել է, և նրա մոտ վարակ չի հայտնաբերվել։ Կնոջ մոտ նույնպես երկրորդ թեստը բացասական է եղել։

Նախարարը հայտնեց, որ կորոնավիրուսի ամբողջական վերացում առնվազն տեսանելի ապագայում չի լինելու։ Նա նշեց, որ իրենց խնդիրը վարակի աճի տեմպի նվազմանը հասնելն է։ Սա կբերի նրան, որ մարդիկ կբուժվեն, և նոր դեպքեր չլինելու պարագայում վարակը կվերանա։ Իհարկե, ըստ Թորոսյանի, սա շատ լավատեսական և ֆանտաստիկ սցենար է, գրում է Armeniasputnik.am-ը։

Հարցին, թե սահմանվե՞լ է հիվանդացության շեմ, որից այն կողմ կորոնավիրուսով վարակվածներից միայն ծանր դեպքերը հիվանդանոցային բուժում կստանան, Թորոսյանը պատասխանեց, որ այս պահին Հայաստանը պատրաստ է վարակման 2000-2100 դեպք վարել միաժամանակ։

«Այս պահին 1700 մահճակալային ֆոնդ է առանձնացված կորոնավիրուսով վարակվածների համար, ինչպես նաև ունենք 300-400 մահճակալներ հյուրանոցային համալիրներում։ Եթե դեպքերն այնքան ավելանան, որ այս շեմն անցնեն, միայն այդ ժամանակ մարդիկ կբուժվեն տնային պայմաններում»,–ասաց նախարարը` հավելելով, որ դա ցանկալի ելք չէ, քանի որ այդ պարագայում մեծանում է նրանց ընտանիքների անդամների վարակման հնարավորությունը։