Գլխավոր Նորություններ ԲՀԿ-ն պահանջում է Նիկոլ Փաշինյանի և կառավարության ամբողջ կազմի հրաժարականը

ԲՀԿ-ն պահանջում է Նիկոլ Փաշինյանի և կառավարության ամբողջ կազմի հրաժարականը

2212

Այն, ինչ իրականացվում է «Բարգավաճ Հայաստան» կուսակցության, ԲՀԿ նախագահ Գագիկ Ծառուկյանի, նաեւ իմ դեմ, հստակ քաղաքական հաշվեհարդար է եւ քաղաքական հետապնդում։ Սաթիկ Սեյրանյանի հեղինակային «Պրեսսինգ» հաղորդման եթերում հայտարարել է  ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանն է։

«Իշխանության ներկայացուցիչները հայտարարում են, թե իրավական գործընթաց է, բայց չի կարելի այդքան ծիծաղելի լինել եւ նման հայտարարություններ անել։ Ամեն ինչ սկսվեց, երբ Գագիկ Ծառուկյանը ԲՀԿ խորհրդի նիստում հայարարություն արեց, որը ոչ մի վիրավորական, որեւէ անպարկեշտ արտահայտություն չէր պարունակում, միայն կառավարության ձախողումների մասին էր։ Եթե դուրս գանք եւ միջին վիճակագրական քաղաքացուն հարցնենք՝ ձեր կյանքում ինչ-որ բան փոխվե՞լ է հեղափոխությունից հետո, եթե նա ասի՝ այո, ես նրանից էլ, ձեզանից էլ ներողություն կխնդրենք։ Միայն մենք ե՞նք ասում, որ կորոնավիրուսի դեմ պայքարը տապալվել է, վարչապետն ինքն է ասում, որ անցնում ենք դժոխքի միջով, առողջապահության նախարարն է տրագիկ դեմքով մռայլ կանխատեսումներ անում։ Համեմատվեք տարածաշրջանի երկրների հետ եւ կտեսնեք, թե ինչ ողբալի պատկեր է այստեղ։ Երբ ամբողջ աշխարհը, նաեւ մենք կոչ էինք անում քայլեր ձեռնարկել, նրանք ուրախ դեմքով դիմավորում էին Իտալիայից ժամանող չվերթը, բուկլետներ էին բաժանում փողոցներում, «Այո»-ի քարոզարշավ էին անում, երկու հոգի մահացել է հիվանդանոց չկարողանալ հասցնելու պատճառով։ Հիմա մենք ուզում ենք ԱԺ-ում քննիչ հանձնաժողով ստեղծել, որը կքննի կորոնավիրուսի դեմ պայքարի արդյունավետությունը։ Նրանց առջեւ այդ հարցերը դրվելու են։ Եթե ամեն ինչ ճիշտ են արել, էլ ի՞նչ ունեն վախենալու։ Եթե առավոտ շուտ մարդիկ քնից վեր են թռչում մեգաֆոնից հնչող վարչապետի ձայնից, որը անընդհատ նույն բանն է ասում՝ կրեք դիմաք, լողացեք ալկոգելով, սոցիալական տարածություն պահպանեք։ Հիմա ես հարց եմ տալիս վարչապետին, պարոն վարչապետ, եթե մարդիկ այդ ամենն անում են, ինչպես եք լուծելու նրանց խնդիրները, սոցիալական ու տնտեսական։ Թե չէ մեղքը գցել մարդկանց վրա․․․ Չեն արել անհրաժեշտ քայլեր վարակի շղթան կոտրելու համար, մարդիկ հայտնվել են ծանր սոցիալական վիճակում։ Կարող եմ կանխատեսում անել, որ հուլիսի 13-ին էլ են երկարաձգելու արտակարգ դրությունը»։

Ինչ վերաբերում է ԱԺ փոխնախագահ Ալեն Սիմոնյանի հայտարարությանը, թե ԲՀԿ քաղխորհրդի նույն նիստից առաջ Գագիկ Ծառուկյանը նույն այգում հանդիպել է Արթուր Վանեցյանի հետ, Նաիրա Զոհրաբյանն ասել է, թե Գագիկ Ծառուկյանը չի թաքցրել իր հանդիպումները եւ կարող է հանդիպել ու հետ եւ երբ ցանկանա․

«Նախապես խնդրագի՞ր պետք է լրացնեն ընդդիմադիր գործիչները՝ իրենց հանդիպումները կազմակերպելու համար, թե՞ իշխանությունն ուզում է գրպանի ընդդիմություն, գրպանի կոճակներն էլ վրայից կոճկած։ Գագիկ Ծառուկյանի հայտարարությունից  հետո բոլոր մարզպետներով, մարզպետների բաջանաղներով, մորքուրներով ու մորքուրի գանձերով, թաղապետերով ու նրանց կոֆե եփողներով, քաղաքապետիկներով սկսեցին արշավը։ Ես ադեկվատ կգնահատեի, եթե Գագիկ Ծառուկյանի հայտարարությունների վերաբերյալ ասեին՝ էս ինչ եք ասում, եկեք քննարկում անենք, ապացուցենք, որ ժողովուրդն իդեալական է ապրում, տնտեսական հեղափոխություն է եղել։ Բայց նրանք անցան հայհոյանքների ու քրեական գործերի հարուցման, ինչը փաստարկների բացակայության վկայությունն է»։

Սաթիկ Սեյրանյանը հիշեցրել է, որ եւ ԲՀԿ քաղխորհրդի նիստում, եւ հունիսի 16-ին Գագիկ Ծառուկյանի ելույթներում չի հնչել Նիկոլ Փաշինյանի անունը, եւ լրագրողներն ու հանրությունն ուզում են իմանալ, եթե Գ․Ծառուկյանն ասում է՝ կառավարությունը 100 տոկոսով պետք է փոխվի, դրա մեջ մտնո՞ւմ է Նիկոլ Փաշինյանը, Նաիրա Զոհրաբյանը պատասխանել է․

«Միանշանակ, ԲՀԿ-ն պահանջում է Նիկոլ Փաշինյանի եւ կառավարության ամբողջ կազմի հրաժարականը։ Ինչո՞ւ, որովհետեւ այս կառավարությունը ձախողել է բոլոր ոլորտները, որովհետեւ տապալել է կորոնավիրուսի դեմ պայքարը։ Եթե Ֆեյք ինդուստրիան գործի են դնում, թե դավաճանություն է այս պահին կառավարությանը մեղադրելը, ապա հիշեցնեմ, որ Իտալիայում, օրինակ, վարչապետին կանչում են հարցաքննության՝ կորոնավիորսւսով պայմանավորված»։ 

Կառավարման որակի վերաբերյալ Նաիրա Զոհրաբյանն ասել է, որ իշխանությունների պահվածքից երբեմն մանկապարտեզի տպավորություն է ստանում․

«Մարզպետներն ամբողջ օրը ստատուս գրելով են զբաղված, դրանց գրառումները նայելով զարմանում ես՝ յա, այսպիսի մարզպետ էլ կա՞։ Կամ կառավարության հետ հարուցպատասխանի ժամանակ մեկ էլ ճլըպ, տեսնում ես կառավարության անդամներից մեկն է էլի ստատուս գրել, կամ բերանը ծռած ինքն իրեն նկարել դրել Ֆեյսբուքում։ Մարդը փոխանակ հետեւի նիստին, գուցե իրեն հարց են տալիս, պրիկոլ է անում, ձեռ է առնում ընդդիմությանը։ Կարծես մանկապարտեզ լինի։ Ողբամ զքեզ հայոց պետականություն», ասել է Նաիրա Զոհրաբյան: