Գլխավոր Նորություններ Անոմալ տաք եղանակին ժամեր անց կհաջորդի անոմալ ցուրտը․ մարզերում արդեն զգում են...

Անոմալ տաք եղանակին ժամեր անց կհաջորդի անոմալ ցուրտը․ մարզերում արդեն զգում են դրա ուժը․ մանրամասներ

1856

Հայաստանում հունվարի 19-22-ը օդի ջերմաստիճանն աստիճանաբար կնվազի 17-20 աստիճանով։

Տեղեկությունը հայտնել է ՀՀ շրջակա միջավայրի նախարարության Հիդրոօդերևութաբանության և մոնիտորինգի կենտրոնի տնօրենի տեղակալ Գագիկ Սուրենյանը։

«Հունվարի 19-ին և 19-ի լույս 20-ի գիշերը հանրապետության ողջ տարածքում սպասվում է ձյուն, առանձին վայրերում` ինտենսիվ, լեռնային շրջաններում սպասվում է նաև բուք, ցածր հորիզոնական տեսանելիություն, ճանապարհներին մերկասառույց։ Օդի ջերմաստիճանը 19-22-ին աստիճանաբար կնվազի 17-20 աստիճանով» ,– Facebook-ի իր էջում գրել է նա։

Եվ ահա, կանխատեսումներն իրենց երկար սպասել չեն տալիս։ Մարզերում ու մարզային ճանապարհներին ձմեռային անոմալ տաքը սառնամանիք ու բուք է դարձել։

ԱԻՆ ՓԾ ճգնաժամային կառավարման ազգային կենտրոնում հունվարի 16-ից 17-ն  7 ահազանգ է ստացվել հանրապետության տարբեր տարածքներում ձյան մեջ արգելափակված ավտոմեքենաների վերաբերյալ: Այս մասին հայտնում են ՀՀ ԱԻՆ տեղեկատվության և հասարակայնության հետ կապերի վարչությունից:

Մասնավորապես՝ Արագածոտնի մարզի Ապարան քաղաքում, Ջրամբար գյուղում, Ճարճակիս գյուղում, Ապարան-Սարալանջ ավտոճանապարհին  և Կոտայքի մարզի Աբովյան քաղաքում։

Դեպքի վայր ժամանած փրկարարներն արգելափակումից դուրս են բերել 7 ավտոմեքենա:

«Ճանապարհային դեպարտամենտ» ՊՈԱԿ-ը տեղեկացնում է, որ հունվարի 18-ին՝ ժամը 09։30-ի դրությամբ‚ Թալինի, Արթիկի, Աշոցքի, Ապարանի, Արագածի, Սպիտակի, Աբովյանի, Հրազդանի, Սևանի, Ճամբարակի, Մարտունիի տարածաշրջաններում, Դիլիջանի ոլորաններում և Թալին-Մաստարա-Լանջիկ-Գյումրի ավտոճանապարհին ձյուն է տեղում։ Ապարանի տարածաշրջանում թույլ գետնաբուք է։

Վարդենյաց լեռնանցքը դժվարանցանելի է բոլոր տեսակի տրանսպորտային միջոցների համար։ Միջպետական և հանրապետական նշանակության մյուս ավտոճանապարհները բաց են:

Ճանապարհաշինարարներն ավտոճանապարհներին կատարում են մաքրման և աղով, ավազով մշակման աշխատանքներ: Վթարներից, պատահարներից և խցանումներից խուսափելու համար վարորդներին խորհուրդ է տրվում երթևեկել բացառապես ձմեռային անվադողերով: